༸སྐྱབས་རྗེ་བཅོ་བརྒྱད་ཁྲི་ཆེན་

༸སྐྱབས་རྗེ་བཅོ་བརྒྱད་ཁྲི་ཆེན་ངག་དབང་མཁྱེན་རབ་ལེགས་བཤད་རྒྱ་མཚོ་ (༡༩༢༠-༢༠༠༧) ནི་དཔལ་ཚར་པའི་གདན་ས་དཔལ་ནཱ་ལེནྡྲའི་མཁན་ཆེན་གདན་རབས་ཉེར་ལྔ་པ་དང་། བསྟན་པའི་གསལ་བྱེད་དམ་པ་ཞིག་ཡིན།

སྐུ་ཚེ་སྟོད་ཀྱི་རྣམ་ཐར།

འཁྲུངས་རབས་དང་བྱིས་པའི་དུས།

རབ་བྱུང་བཅོ་ལྔའི་ལྕགས་ཕོ་སྤྲེའུ་ལོའི་ (༡༩༢༠) བོད་ཟླ་བརྒྱད་པའི་ཚེས་བཞི་ལ། ཞ་ལུ་སྐུ་ཞང་གི་རིགས་སུ་ཡབ་བསོད་ནམས་སེངྒེ་དབང་ཕྱུག་དང་། ཡུམ་དཔལ་གླིང་སྲས་མོ་འཆི་མེད་སྒྲོལ་དཀར་གཉིས་ཀྱི་སྲས་སུ་ངོ་མཚར་བའི་ལྟས་དང་བཅས་འཁྲུངས། ཁུ་བོ་ཁང་གསར་མཁན་པོ་འཇམ་དཔལ་སྙིང་པོས་མཚན་ལ་**ཀུན་བཟང་འཆི་མེད་དབང་པོ་**ཞེས་གསོལ།

གདན་སར་མངའ་གསོལ།

དགུང་ལོ་བཅུ་པ་སྤྱི་ལོ་ ༡༩༢༩ ལོར། ༸རྒྱལ་བ་བཅུ་གསུམ་པ་ཆེན་པོས་བཅོ་བརྒྱད་ཁྲི་ཆེན་རིན་ཆེན་མཁྱེན་བརྩེའི་དབང་པོའི་མ་འདས་སྤྲུལ་སྐུར་ངོས་འཛིན་གནང་ཞིང་། **བློ་བཟང་ཐུབ་བསྟན་རིན་ཆེན་**ཞེས་མཚན་གསོལ། དགུང་ལོ་བཅུ་གཉིས་པར་རོང་སྟོན་ཆེན་པོའི་ཆོས་ཁྲིར་མངའ་གསོལ་བ་དང་། དགུང་ལོ་ཉེར་གཉིས་པར་མཁན་ཆེན་ངག་དབང་བློ་གྲོས་གཞན་ཕན་སྙིང་པོའི་མདུན་ནས་བསྙེན་རྫོགས་ཀྱི་སྡོམ་པ་བཞེས།

གསན་བསམ་དང་མཛད་འཕྲིན།

གསན་བསམ།

ཁོང་གིས་མཁན་ཆེན་ངག་བློ་རིན་པོ་ཆེ་དང་། ཡོངས་འཛིན་ཀུན་དགའ་ཆོས་འཕེལ་སོགས་བཤེས་གཉེན་དུ་མ་ལས་མདོ་རྒྱུད་རིག་གནས་དང་བཅས་པ་རྒྱ་ཆེར་གསན་བསམ་གནང་། ལྷག་པར་དུ་ལམ་འབྲས་སློབ་བཤད་དང་། རྒྱུད་སྡེ་ཀུན་བཏུས། སྒྲུབ་ཐབས་ཀུན་བཏུས་སོགས་ས་སྐྱ་པའི་ཟབ་ཆོས་མཐའ་དག་གི་མཛོད་དུ་གྱུར།

བསྟན་པའི་འགྲོ་དོན།

བོད་དུ། འཕན་ཡུལ་ནཱ་ལེནྡྲའི་ཚོགས་ཆེན་ཉམས་གསོ་དང་། གསང་ཆེན་གྲྭ་ཚང་དུ་ཀྱེ་རྡོར་རྒྱུད་བཤད་བཙུགས་པ་སོགས་རྟེན་དང་བརྟེན་པ་མང་པོ་བཞེངས།
བལ་ཡུལ་དུ། ལུམྦཱི་ནིར་བཀྲ་ཤིས་རབ་བརྟན་གླིང་དང་། བལ་ཡུལ་མཆོད་རྟེན་ཉེ་འཁོར་དུ་བྱམས་ཆེན་ལྷ་ཁང་ཡིད་དགའ་ཆོས་འཛིན་གླིང་ཕྱག་བཏབ།
རྒྱལ་སྤྱིར། སེངྒ་སྤུར་དང་། མ་ལི་ཤི་ཡ། ཨ་རི། ཡོ་རོབ་སོགས་སུ་ཕེབས་ནས་འགྲོ་དོན་རྒྱ་ཆེར་མཛད། ༸གོང་ས་བཅུ་བཞི་པ་ཆེན་པོར་ལམ་འབྲས་སློབ་བཤད་སོགས་ས་སྐྱ་པའི་ཟབ་ཆོས་མང་པོ་ཕུལ།

གསུང་རྩོམ།

དཔལ་ས་སྐྱའི་ཆོས་འབྱུང་མདོར་བསྡུས་བསྐལ་བཟང་ཡིད་ཀྱི་དགའ་སྟོན།
སྙན་ངག་མེ་ལོང་མའི་ལེའུ་གསུམ།
མངོན་པ་མཛོད་ཀྱི་འགྲེལ་པ་ (རིག་གནས་གསར་བརྗེའི་སྐབས་བརླགས་པར་གྱུར)།

དགོངས་པ་རྫོགས་པ།

༢༠༠༧ ལོའི་བོད་ཟླ་བཅུ་གཉིས་པའི་ཚེས་བཞི་ཉིན། དགུང་གྲངས་གྱ་བདུན་ཐོག་བལ་ཡུལ་སྙན་བརྒྱུད་བསམ་གཏན་ཆོས་གླིང་དུ་དགོངས་པ་ཆོས་དབྱིངས་སུ་ཐིམ། སྐུ་གདུང་བཞུ་འབུལ་སྐབས་ནམ་མཁར་འཇའ་འོད་ཤར་བ་དང་རིང་བསྲེལ་དཔག་ཏུ་མེད་པ་འཁྲུངས་པ་སོགས་ངོ་མཚར་བའི་ལྟས་དུ་མ་བྱུང་ངོ་།།