མར་མེ་འབུལ་ཚུལ་

ཡོང་ཁུངས་Wikipedia

མར་མེ་འབུལ་བའི་ཁུངས།[རྩོམ་སྒྲིག]

མདོ་ལས།  རྒྱལ་བོ་གསལ་རྒྱལ་གྱིས་དེ་བཞིན་གཤེགས་པ་མཆོད་ཕྱིར།  སྟོན་ཟླ་ཐ་ཆུང་ཉ་བའི་ཚེས་བཅོ་ལྔ་ལ།  འབྲུ་མར་ཟངས་པོ་ཆེ་སྟོང་བཀང་སྟེ།  དངར་ནས་མར་མེ་སྦར་བའི་འོད་ཀྱིས་ཁོ་ར་ཁོར་ཡུག་ཏུ་དཔག་ཚད་བཞིར་སྣང་བས་ཁྱབ་པར་བྱས་སོ།།  སོགས་མདོ་དང་བསྟན་བཅོས་ལས་མང་དུ་གསུངས་ཡོད་པ་དེའོ།།

མར་མེ་ལག་ལེན་བྱ་ཚུལ།[རྩོམ་སྒྲིག]

མར་མེ་ནི། གཟུགས་ཀྱི་མཆོད་པ་ཡིན་ལ། ཚོགས་བསགས་ཀྱི་དགེ་བ་སྟོབས་ཆེན་ཞིག་ཡིན། ལན་ལེན་ནི། རྐོང་བུ་བྱི་བདར་ལེགས་པར་བྱས་ཏེ། རབ་ཡིན་ན། སྡོང་བུ་གསེར་དངུལ་དང་། མ་འབྱོར་ན། རྩི་ཤིང་དྲི་བཟང་ཅན། རྐོང་བུའི་ཚད་ལ་དཔག་སྟེ། ཕྲ་སྦོམ་རན་པ། དྲང་ཞིང་རྩེ་མོ་རྣོ་བ་ཅན་ལ། མ་མོག་གིས་དཀྲི་ཐེངས་གསུམ་བྱས་ནས། རྐོང་ཕིག་ཏུ་བརྟན་པར་གཟུགས། ཡང་ཤེས་རབ་རྣོན་པོ་ཡོང་བའི་ཆེད་དུ་རྒྱ་ཁབ་ཀྱི་སྟེང་དུ་རས་བལ་གྱིས་དཀྲི་བའང་ཡོད། མར་ཁུ་ལ། མར་གཙང་ནང་དུ་དྲི་བཟང་བཏབ་སྟེ། བཙགས་ཐག་ཆོད་པར་བྱས་ནས། སྙིགས་རོ་བསལ་ཏེ། རྐོང་བུའི་ནང་དུ་ལྡུགས་ལ། དེ་ཡང་། རྒྱུ་མར་རྙིང་རུང་མི་རུང་ལ་གསུངས་ཚུལ་གཉིས་ཡོད་ཀྱང་། རྣམ་གྲོལ་ལག་བཅངས་ལས། མར་མེ་འོད་ཕུལ་བ་ཡིན་གྱི། མར་ཁུ་ཕུལ་བ་མིན་པས། ཅུང་ཟད་ཁ་ཚ་ཙམ་ཡོད་ཀྱང་ཆོག་པར་གསུངས་སོ།།

ལག་ལེན་མ་དག་པའི་ཉེས་དམིགས།[རྩོམ་སྒྲིག]

རྐོང་བུ་དག་གཙང་མ་ཕྱིས་པས། གཟུགས་མི་སྡུག་པར་སྐྱེས། སེར་སྣ་ཤོར་བས། ཡི་དྭགས་སུ་སྐྱེས། ཚགས་མ་བྱས་པ་དང་ས་རྡུལ་གྱིས་སྦགས་པས། དུད་འགྲོར་སྐྱེས་སོ།། གཞན་ཡང་། དབྱར་དུས་སུ། མར་མེ་ལ་འོད་ཁང་དང་དྲ་མིག་མེད་པར། ཕྱེ་ལེབ་སོགས་སེམས་ཅན་མང་བོ་འཚེད་པ་ཡིན་ན། དཀོན་མཆོག་མཉེས་པ་ལས་ལྡོག་སྟེ། དེ་ལ་ཐབས་ཤེས་སྣ་ཚོགས་བྱས་ནས། མཆོད་གཏོར་བཤམས། ཆབ་ཀྱིས་བྲན་ལ་སྤོས་ཀྱིས་བདུག གྲིབ་སྲུང་གི་རྫས་ཀུ་ཤ་དང་རྨ་བྱའི་སྒྲོ་སོགས་ཉེ་འཁོར་དུ་བཞག་ལ། བགེགས་མི་འཇུག་པའི་བྱིན་རླབས་བྱ་དགོས་སོ།།

མར་མེ་སྦར་ཚུལ།[རྩོམ་སྒྲིག]

མེ་མ་ཤི་ཙམ་པའི་འོད་ཀྱིས་རྒྱུན་རིང་བོར་བྱེད་པས། ཚེ་རིང་བའི་རྟེན་འབྲེལ་ཡོད་པ་དང་། སྡོང་བུ་ཧ་ཅང་མི་སྦོམ་པར། འོད་གསལ་བའི་སྟེང་ནས། དལ་འབར་བྱས་ན་ལེགས་པར་བསྟན་རིམ་ལས་གསུངས་སོ།།

མར་མེ་སྒྲོན་དུས་ཀྱི་འདོན་ཆོག[རྩོམ་སྒྲིག]

སྤྱིར་ན། མར་མེའི་འདོན་ཆོག་རྒྱས་བསྡུས་མང་དུ་ཡོད་ཀྱང་། ཧ་ཅང་སྟབས་བདེ་འདོན་ན་འདི་ལྟར།

ཨོཾ་ཨཱཿ་ཧཱུཾ།

མར་ཁུ་རྒྱ་མཚོ་ཡོངས་སུ་འཁྱིལ་བའི་རྐོང་།།

ཕུན་ཚོགས་འོད་སྟོང་འབར་བའི་སྒྲོན་མེ་འདིས།།

མུན་པའི་བསྐལ་བ་ཡོངས་སུ་སངས་བྱས་ནས།།

འགྲོ་རྣམས་སངས་རྒྱས་མངོན་སུམ་མཐོང་བར་ཤོག།

མར་མེ་འདི་ཡིས་བསོད་ནམས་ཀྱིས།།

མ་རིག་མུན་པ་སེལ་བར་ཤོག།

ཡེ་ཤེས་སྤྱན་དང་ལྡན་པར་ཤོག།

ཤེས་རབ་རྩ་ཁ་དབྱེ་བར་ཤོག།

ཅེས་བཏོན་ན་ཕན་ཡོན་ཆེའོ།།

མར་མེའི་མཚོན་དོན།[རྩོམ་སྒྲིག]

སྡོང་ཤིང་རྣོ་བས། རིག་པ་རྣོ་བ། སྡོང་བུའི་རྩ་བ་བརྟན་པས། བསམ་གཏན་དང་། སྡོང་བལ་རིམ་པ་གསུམ་དུ་དཀྲིས་པས། ཚུལ་ཁྲིམས། བཟོད་པ། བརྩོན་འགྲུས་གསུམ་དང་། མར་ཁུ་མེར་གྱིས་གང་བས། སྦྱིན་པ་སྟེ་ཕར་ཕྱིན་དྲུག་མཚོན་ནོ།།

མར་མེ་ཕུལ་བའི་ཕན་ཡོན།[རྩོམ་སྒྲིག]

མར་མེ་ཕུལ་བས། འཆི་བའི་དུས་ཀྱི་སྣང་བ་གསུམ། ཟང་ཟིང་མེད་པའི་དགའ་བ་བཞི། འདུན་པ་བཞི། ཡོངས་སུ་དག་པ་བཞི། ཆོས་ཀྱི་མཆོག་བརྒྱད། སོ་སོ་ཡང་དག་བཞི་སོགས་འཐོབ་ལ། དཔེར་ན། དབུལ་མོ་བསྙེན་དགའ་མོས། རྒྱལ་བློན་སོགས་ཀྱིས་སངས་རྒྱས་ལ་མར་མེ་འབུལ་བ་མཐོང་ནས། ཉིན་གཅིག་རིང་སློང་མོ་བྱས་པའི་དོང་ཙེ་གཅིག་པུས་མར་ཉོས་ནས། བསམ་པ་རྣམ་དག་གིས། མཆོད་པ་ཕུལ་བས། བཅོམ་ལྡན་འདས་ཀྱིས། མ་འོངས་པ་ན། མཚན་ཡང་། མར་མེ་འོད་ཅེས་བྱ་བའི་ངོ་བོར་འཚང་རྒྱ་བར་ལུང་དུ་བསྟན་ཏོ།།