གཅན་ཚ་རྫོང་མི་རིགས་སློབ་འབྲིང

ཡོང་ཁུངས་Wikipedia

གཅན་ཚ་རྫོང་མི་རིགས་སློབ་འབྲིང་ནི་རྨ་ཆུ་འགྲམ་རྒྱུད་ཀྱི་མར་ཁུ་ཐང་གྲོང་བརྡལ་དུ་ཆགས་ཤིང༌།རྨ་ལྷོ་བོད་རིགས་རང་སྐྱོང་ས་ཁུལ་གྱི་སློབ་འབྲིང་ཁྲོད་དུ་གཞི་ཁྱོན་ཅུང་ཆེ་བའི་བོད་ཡིག་གཙོ་གཉེར་གྱི་བཅའ་སྡོད་སློབ་གྲྭ་ཞིག་ཡིན། སློབ་གྲྭ་འདི1979ལོར་གསར་དུ་བཙུགས་པ་ཡིན་ཞིང་ས་ངོས་གཞི་ཁྱོན་ལ་མུའུ74ཡོད།དེ་ལས་བཟོ་སྐྲུན་རྒྱ་ཁྱོན་གྱིས་རྨིད་ངོས་སྙོམས་གྲུ་བཞི་མ14200ལྷག་ཟིན་ཡོད། མིག་སྔར་སློབ་གྲྭས་དམའ་འབྲིང་དང་མཐོ་འབྲིང་སྟེ་ལོ་རིམ་དྲུག་གི་འཛིན་གྲྭ་ཉེར་བདུན་བཙུགས་ཡོད་ལ།སློབ་མ་བསྡོམས་པས1436ཡོད་པ་དང༌། དེའི་ནང་དུ་བོད་རིགས1421ཡོད་པ་དེས་སློབ་མའི་གྲངས་འབོར་སྤྱིའི་99.1%ཟིན་པ་དང༌།ཧོས་རིགས་སློབ་མ33ཡོད་པ་དང༌།དེས་སློབ་མའི་གྲངས་འབོར་སྤྱིའི་2.8%ཟིན། སློབ་མའི་འབྱུང་ཁུངས་ནི་རང་རྫོང་གི་ཞིང་གྲོང12ཀྱི་དབུལ་བོའི་ཁྱིམ་ཚང་ནས་ཡོང་བའི་བོད་ཡིག་སློབ་ཆུང་གི་མཐར་ཕྱིན་སློབ་མ་དང༌།མཚོ་ལྷོ་དང༌། མཚོ་བྱང༌། ཞུང་ཧྭ། རེབ་གོང༌། རྩེ་ཁོག རྨ་ལྷོ་སོག་རྫོང༌། དཔའ་ལུང་སོགས་ཁུལ་དང་རྫོང་ཕྱི་ནས་ཡོང་བའི་བོད་རིགས་སློབ་མ་ཡིན།རྫོང་ཕྱིའི་སློབ་མས་སློབ་གྲྭ་ཡོངས་ཀྱི་6%ཟིན་ཞིང༌། སློབ་ཡོན་སོགས་གྲོན་དངུལ་གྱི་ཐད་ནས་རྫོང་ནང་ཁུལ་གྱི་སློབ་མ་དང་འདྲ་བར་གཅིག་གྱུར་གྱིས་བསྡུ་རུབ་བྱེད་པ་ཡིན།སློབ་གྲྭ་སྤྱི་ལ་དགེ་རྒན་དང་ལས་བཟོ་བ་བསྡོམས་པས་107ཡོད་ཅིང༌། བོད་དང་རྒྱ།ཧོས།ཟ་ལེར།ཧོར།སོག་པོ་བཅས་མི་རིགས་དྲུག་གིས་གྲུབ།དེའི་ནང་ཆེད་ལས་དགེ་རྒན79ཡོད། ཤེས་ཡོན་ཚད་རིམ་གྱི་ཆ་ནས་བཤད་ན།སློབ་གྲྭ་ཆེན་མོའི་དངོས་གཞི་ཆུ་ཚད་ཅན28དང༌། སློབ་གྲྭ་ཆེན་མོའི་ཆེད་སྦྱོང་ཅན48དང༌། འབྲིང་རིམ་ཆེད་སྦྱོང་ཅན3 བཅསཡོད། དགེ་རྒན་ལས་ཐོབ་ཀྱི་ཆ་ནས་བཤད་ན། སློབ་འབྲིང་མཐོ་རིམ་དགེ་རྒན་མི3དང༌། སློབ་འབྲིང་རིམ་པ་དང་པོའི་དགེ་རྒན21། སློབ་འབྲིང་རིམ་པ་གཉིས་པ་དང་གསུམ་པའི་དགེ་རྒན་བསྡོམས་པའི་མི55ཡོད། སྤྱི་གཉེར་བ་དང་ཇ་མ་བསྡོམས་པའི་མི28ཡོད། གཞན་ཡང་དབྱིན་ཡིག་སློབ་ཁྲིད་ཀྱི་སྤུས་ཚད་མཐོར་འདེགས་གཏོང་ཕྱིར་ཞིང་ཆེན་རིམ་པར་ཡར་ཞུ་ཐེངས་མང་བྱས་རྗེས།སློབ་གསོའི་གྲོན་དངུལ་ཐད་དཀའ་ཁག་ཤིན་ཏུ་ཆེ་ནའང་ཁང་གླ་དང་ཟླ་ཕོག་སོགས་ སྤྲད་དེ་ཅ་ན་ཏ་རྒྱལ་ཁབ་ཀྱི་དགེ་རྒན་གཉིས་གདན་དྲངས་ཏེ་དབྱིན་ཡིག་སློབ་ཁྲིད་གནང་བཞིན་ཡོད།སློབ་གྲྭའི་སྒྲིག་གཞི་ལ་སློབ་གཙོ་ཁང་དང་སློབ་སྟོན་ཁང༌།སྲིད་སྟོན་ཁང༌། སྤྱི་གཉེར་ཁང་བཅས་ཡོད་ལ། དེ་ཡང་སློབ་གཙོ་གཙོ་གཞོན་གསུམ་དང་ཆེད་ལས་ཀྲི་པུའུ་ཧྲུའུ་ཅི་གཅིག ཁྲུའུ་རེ་ལ་གཙོ་འགན་པ་བཞི་རེ་དང༌།སློབ་དཔྱོད་ཁང་ལ་བོད་ཡིག་དང་རྒྱ་ཡིག རྩིས་རིག དངོས་ལུགས། རྫས་འགྱུར། ཆབ་སྲིད། ལོ་རྒྱུས།དབྱིན་ཡིག མཛེས་རྩལ་སྟེ་ཁག་བདུན་གྱིས་གྲུབ། སློབ་གྲྭས་ད་རག་བར་བསྡོམས་པས་དམའ་འབྲིང་སློབ་མ4970དང༌། མཐོ་འབྲིང་སློབ་མ2281། ལས་རིགས་འཛིན་གྲྭའི་སློབ་མ་160བསྡུས་པ་ལས་འབྲིང་རིམ་ཆེད་ལས་སློབ་གྲྭར་བསྡོམས་པས་སློབ་མ787བསྐྱལ་བ་དང༌།དེས་དམའ་འབྲིང་མཐར་ཕྱིན་སློབ་མའི22.7%ཟིན། སློབ་གྲྭ་ཆེན་མོར་སློབ་མ་1015བསྐྱལ་ལ། དེས་མཐོ་འབྲིང་མཐར་ཕྱིན་སློབ་མའི་66.6%ཟིན། 1996ལོའི་ཚུན་གྱི་ལོ་ངོ་བརྒྱད་ཀྱི་རིང་ལ་སློབ་གྲྭ་འདིས་བསྟུད་མར་འབྲིང་རིམ་དང་མཐོ་རིམ་སློབ་གྲྭར་སློབ་མ་བསྐྱལ་ཚད་ཁུལ་ཡོངས་ཀྱི་ཨང་དང་པོ་བླངས་ལ།ལོ་འདི་འགའི་རིང་ལ་ཕུལ་བྱུང་སློབ་མ900ལྷག་གིས་ཞིང་ཆེན་ཕྱི་ནང་གི་མཐོ་རིམ་དང་འབྲིང་རིམ་སློབ་གྲྭ་དག་ན་སློབ་གཉེར་བྱེད་པའི་སྒང་ཡིན།